السلام عليكم ورحمة الله وبركاته
ليش أغلب أقلام الرصاص لونهم أصفر؟
Jul 06
مادري إذا منتبهين حق أقلام الرصاص بكل مكان أغلبهم يكونون مصبوغين أصفر من برّه وعليهم خطوط سوده، ليش؟ وليش أغلبهم سداسيين الأطراف؟
بدت السالفة من سنة 1890م لما شركة L. & C. Hardtmuth Company قررت تطرح ماركة أقلام رصاص بإسم Koh-I-Noorهامش* طرحت أقلام الرصاص بالسوق للبيع وكانوا يبون يخلونه أحسن وأغلى قلم رصاص بالعالم، أيامها كانت أقلام الرصاص يا اما مصبوغين بلون غامج يا اما مو ملونينهم أصلاً بس خشب وخلاص، فخلوا لون أقلامهم أصفر.
مو بس عشان يتميزون بين باجي الماركات، اللون بخطوطه السوده يرجع حق العلم القديم لامبراطورية النمسا والمجر اللي طلعت منها الشركة L. & C. Hardtmuth Company.
شوفوا صورة العلم، لاحظوا الشبه باللون بينه وبين أقلام الرصاص المخططة أصفر بأسود:
من كثر ما اشتهرت أقلام هالشركة بجودتها قامت الشركات الثانية تستخدم نفس اللون والخطوط السوده عشان يضيعون الناس ويشترون اقلامهم التقليد، واستمرت السالفة لي اليوم.
تفسير ثاني ينقلونه ان اللون الأصفر كان يعطي إيحاء شرقي، وكل شي “شرقي” ذيك السنوات كان مرغوب حيل من الغربيين ويمشي سوقه بسرعة، خاصة وان أجود أنواع الرصاص كان ايي من سيبيريا (شمال آسيا). عاد مو قلّدوا اللون بس، لا قاموا حتى يسمون أقلامهم أسماء شرقية وصينية عشان يضيعون الناس أكثر.
نظرية ثانية شوي تدور بالموضوع أكثر بس ما شفت لها مصدر يأكدها، يقولون اللون الأصفر كان يُعتبر لون ملكي فخم بالصين، وبسنوات الـ1800 كان أحسن رصاص اييبونه من الصين. فقاموا يصبغون أقلام الرصاص بالأصفر عشان يربطون الفكرة بجودة الرصاص والصورة الملكية المنتشرة عن اللون أيامها.
مع هذا تظل بعض الدول لها طريقتها وثقافتها الخاصة، يعني مثل البرازيل وألمانيا المشهور بأقلام الرصاص لونهم الأخضر. اللون يرجع لماركة Faber-Castell الألمانية الشهيرة وتتميز فيه حق أغراضها المكتبية. حتى بالكويت شفنا هالماركة وعرفناها من كنا صغار. هذي صور حق الماركة:
بدول جنوب أوروبا أقلام الرصاص مشهورة تكون باللون الأحمر الغامج أو أسود بشكل عام مع بعض الخطوط الصفره. بأستراليا اللون المشهور أحمر مع دوائر سوده بالطرف. الهند يستخدمون اللون الأحمر الغامج مع خطوط سوده.
زين ليش نشوف الأقلام يصنعونها سداسية الأطراف مو اسطوانية؟
الشكل السداسي يسهّل عملية التصنيع وترتيب الأقلام في العلب يم بعض، مسكته أريح بالايد منه إذا كان مربع الأطراف أو مثلث حتى. زيادة على هذا الأقلام ما راح تتدحرج إذا حطوها على سطح مستوي وتثبت أكثر.
معلومات أخيرة
المسّاحة الصغيرة اللي يحطونها على راس القلم، هذي اكتشفها واحد اسمه هيمن ليبمن – Hymen Lipman بتاريخ 30 مايو 1858م وسجلها براءة اختراع، بعدها بأربع سنوات باع البراءة على جوزيف ركندورفر – Joseph Reckendorfer بـ100 ألف دولار. شوي ولا يشوفون شركة Faber-Castell الألمانية مقلدين الفكرة وحاطين مساحات على اقلامهم، رفعوا عليهم قضية بس خسروها سنة 1875م، قالوا البراءة غير صالحة، ليش؟ مادري.
شفتوا القطعة الحديدية اللي يلفونها على المساحة عشان تمسك بالقلم؟ هذي يسمونها بالانجليزي Ferrule.
